EL COCHE'L MAESTRU

EL COCHE'L MAESTRU
Va tiempu que nun se ve
en pueblu cacharru tal.
Pol ruíu paez un avión
y pol fumu un calamar.

El coche'l maestru tien más años yá
que la campanona de la catedral.
Nin frena, nin pita, nin tien marcha atrás,
y el gatu ye un gatu miagar.

Nun tien un torniellu bien,
fálta-y una puerta atrás,
y milagroso paez
qu'esi trastu puea andar.

El coche'l maestru tien más años yá
que la campanona de la catedral.
Nin frena, nin pita, nin tien marcha atrás,
y el gatu ye un gatu miagar.

Frénalu sacando un pie,
tamién-y falta un cristal;
va tiempu que nun se ve
en pueblu cacharru tal.


El coche'l maestru tien más años yá
que la campanona de la catedral.
Nin frena, nin pita, nin tien marcha atrás,
y el gatu ye un gatu miagar.

El coche'l maestru tien más años yá
que la campanona de la catedral.
Nin frena, nin pita, nin tien marcha atrás,
y el gatu ye un gatu miagar.

BAMBI

BAMBI

Colaron del cielu les estrelles

y ta despertando’l bosque.

Per un caminín ente unes peñes

 Bambi va al regatu a beber.

Bambi, oreyines d’algodón

xuega coles caparines.

Bambi cuénta-y cuentos a una flor

qu’a la vera’l bosque alcontró.

Díxome un esguil que yo conozo

que-y dixeron dos rapiegues

que lu vieron llocu de contentu

un llunes qu’entamó a nevar.

Bambi, oreyines d’algodón

xuega coles caparines.

Bambi cuénta-y cuentos a una flor

qu’a la vera’l bosque alcontró.

Bambi, oreyines d’algodón

xuega coles caparines.

Bambi cuénta-y cuentos a una flor

qu’a la vera’l bosque alcontró.

Bambi, oreyines d’algodón

xuega coles caparines.

Bambi cuénta-y cuentos a una flor

qu’a la vera’l bosque alcontró.

Bambi, oreyines d’algodón

xuega coles caparines.

Bambi cuénta-y cuentos a una flor

qu’a la vera’l bosque alcontró.

LA SERENA

LA SERENA

Veriquina la playa en delles nueches de lluna enllena,

siéntese seliquino ‘l cantu melgueru d’una serena

que namoró a un marineru que la sintiere canciar

cuando ‘l so barcu veleru

tornaba un día de la mar.

Veriquina la playa en delles nueches de lluna enllena,

siéntese seliquino’ l canciu melgueru d’una serena.

Y diz la xente del puertu que la serena la mar

fai d’amores prisioneru al que la siente cantar.

Veriquina la playa en delles nueches de lluna enllena,

cuénta-y los sos amores el marineru a la serena.

MÁS CANCIONES DE XENTIQUINA

Voi incluir tres canciones más de Xentiquina, yá sabéis, esi grupu musical que tantes allegríes y bonos momentos nos dio durante 25 años. Estes tres canciones llámense: "La Serena", "Bambi" y "El coche'l maestru".

Faigo un resume de caún de los cantares y dempués cuélgovos tres entraes nel blog colos vídeos y les lletres de cada cantar.

LA SERENA
La serena ye ún de los munchos personaxes mitolóxicos qu'existen n'Asturies. Nel cantar, fálase de delles carauterístiques que tienen les serenes, como la guapura de la so voz, canten perbién, y como esa voz pue namorar a los marineros que la sientan.





BAMBI

Esti cantar fala sobre'l cervatín más famosu de la historia, Bambi, y de como esti animal va interaccionando cola viesca y colos diferentes elementos que la componen.

EL COCHE'L MAESTRU
A diferencia de los otros dos cantares, equí'l protagonista nun ye un ser vivu, sinón dalgo que nun tien vida; un coche. A lo llargo del cantar vamos dir descubriendo que esti coche, que pertenez a un maestru, tien bastantes años y nun ta nes meyores condiciones posibles.

UNA DE MIEU

¿CONOCÉIS EL CANTAR UNA DE MIEU?
Si nun lu conocéis, esta va ser una bona oportunidá pa escuchalu.

Enantes de ponevos a ello, tenéis que saber qu'esti cantar foi interpretáu por Xentiquina, un grupu musical de neños y neñes que se dedicaron a crear y componer bien de canciones na nuestra llingua asturiana.
El fundador de Xentiquina nun yera otru que Nacho Fonseca Alonso, un maestru de llingua y de música que compuso durante 25 años diferentes cantares col oxetivu de da-y punxu (fuerza) al asturianu.
Llamentablemente, nel añu 2011 el grupu desanicióse (disolvióse), debío a que'l so fundador, Nacho Fonseca, xubilóse.

Vamos yá a entamar col cantar. Pinchái na imaxe pa escuchalu y lleer la lletra de la canción.

LLUCHANDO CONTRA'L CORONAVIRUS

Güei cúmplese la segunda selmana na que se suspendieron les clases y tuvimos que quedanos nes nuestres cases pa protexenos d'un virus que ta presente nel nuestru país y tamién fuera d'España.

La prevención nesti casu ye perimportante, ye dicir, saber que coses y aiciones tenemos que poner en práutica pa nun garrar el nomáu virus.

Iniciativa pol Asturianu, que ye un grupu de persones que trabayen pa consiguir que la llingua asturiana seya vista como una llingua fundamental dientro de la nuestra tierrina asturiana, ellaboró dellos cartelos que son mui útiles a la hora d'evitar que más persones se contaxen del virus.

Anque los cartelos tán na nuestra llingua asturiana, creo que ye bastante entendible lo que ponen. Amás, vienen acompañaos de dibuxos que nos ayudan a comprender qué coses podemos facer y qué otres debemos evitar.

Déxovos equí la páxina web pa que miréis los cartelos con calma y faigáis casu de toles recomendaciones que dan, dau que son perimportantes.

EL MENSAXE INCOMPLETU

Bonos díes, escolinos y escolines; güei vais descifrar un mensaxe nel que dalgunes pallabres nun son visibles. Eses pallabres invisibles tarán formaes por rayes y cada raya representará una lletra. Diré dando pistes pa eses pallabres que nun tán escrites pa que les vayáis adivinando.

Pongo un exemplu pa que nun tengáis problemes n'entendelo:

Con estes pistes tendréis que descifrar el mensaxe. De tal mou qu'esti mensaxe quedaría resueltu asina:

Agora tócavos a vosotros y vosotres descifrar el siguiente mensaxe. Pinchái na imaxe pa entamar l'actividá.

MÁS CUENTINOS EN LLINGUA ASTURIANA

Los cuentos son el meyor recursu col que contamos los maestros pa tresmitir conocimientu y la meyor manera que tenéis los neños y neñes pa entretenevos mientres aprendéis una montonera coses.

Por ello, a continuación voi dexavos tres enllaces a tres cuentos estremaos (diferentes) que nos falen caún d'ellos d'un tema concretu. Namái tenéis que pinchar nes imáxenes pa escuchar y lleer les aventures de los sos protagonistes.

                              ESPERO QUE VOS PRESTE 

EL MUNDO DE TISTA
Una xaronca, llamada Tista, preséntanos el so entornu y descúbrenos una información interesante: la esistencia de plantes carnívores n'Asturies.

CASTAÑES
Esti cuentín trata sobre una neña que-y gusta dir a la gueta, ye dicir, présta-y pañar castañes del suelu. Pero esta xera pue llegar a ser dalgo peligroso.

L'ENCANTAMIENTU
Los encantamientos, el cuélebre y la nueche de San Xuan (23 de xunu) son los elementos que componen esta historia de la nueche más máxica del añu.

ELLABORACIÓN DE LA SIDRA

Ún de los elementos más representativos d'Asturies ye la sidra. Pa facer sidra necesitamos, amás de les mazanes, toa una serie de ferramientes y procesos que van permitir ellaborala.

              ¿QUÉ FAI FALTA PA FACER SIDRA?

Pa responder a la pregunta, voi ponevos un cuentín mui curtiu nel que van esplicando los elementos y aiciones que formen parte del procesu d'ellaboración de la sidra.

PINCHÁI NA IMAXE DE LES MAZANES PA PODER VER EL VIDEU.







Vaya rápidu que va'l videu, pero nun vos esmolecer yá que fici un resume de les coses más importantes que diz Isidro. Pa ello namái tenéis que pinchar onde pon RESUME.

LES COSADIELLES

Entamamos una nueva selmana con un pequeñu retu que vos propongo; a ver cuantes cosadielles sois quienes a aldovinar. Pero ¿QUE YÉ UNA COSADIELLA?

Esta pallabra nun la debéis confundir cola casadiella, esi dulce de nuez, ablana, azucre y anís que se tuesta n'aceite.

La cosadiella ye una aldovinanza, una fórmula onde se describe de forma inxeniosa daqué pa que les persones que lo escuchen o lo llean intenten aldovinar qué ye.

Una de les carauterístiques de les cosadielles ye que siempre van entamar de la mesma forma:

               ¿QUÉ COSA COSADIELLA YE...? 

Por exemplu: ¿Qué cosa cosadiella ye una parte del cuerpu que paecen persianes, subiendo y baxando cada poco?

¿Yá aldovinastis lo que yera? Pues sí, son les pestañes que suben y baxen cada vez qu'abrimos y zarramos los güeyos. 

Llegó'l momentu de poner en xuegu les vuestres habilidaes. Pinchái na imaxe pa ver cuántes cosadielles sois quienes a aldovinar. ¡MUNCHA SUERTE !

LLEGÓ LA PRIMAVERA

Güei tamos a venti de marzu, ¿SABÉIS QUÉ PASA ESTI DÍA? Pues que cambiamos d'estación del añu. L'iviernu yá quedó atrás y entama la primavera.

Cada estación del añu tien unes carauterístiques concretes. Por exemplu:

Nel BRANU fai calor a esgaya; los díes son perllargos y les nueches más curties, alboreciendo (amaneciendo) más ceo (temprano).

Na SERONDA facemos nos colexos la fiesta del amagüestu y eso ye posible porque esta ye la estación de los frutos y les frutes: castañes, ablanes, nueces, cacagüeses, mazanes, naranxes, quivis, etc.
Otra carauterística de la seronda ye la caída de les fueyes de los árboles y entama a menguar (disminuir) la temperatura y a orbayar davezu (con cierta frecuencia). 

 La estación qu'acabamos de pasar de llargu ye l'IVIERNU, onde les temperatures son perfríes y les precipitaciones abondantes. La nieve ye un elementu que solemos atopar nel iviernu.
A diferencia del branu, les nueches son mui llargues y los díes son bastante curtios. Les calles enllénense d'abrigos, bufandes y guantes.

Pero ¿QUÉ CARAUTERÍSTIQUES TIEN LA PRIMAVERA? 
Esa ye una respuesta que vais contestar vosotros y vosotres. Pa ello pinchái na imaxe de la manzorga.

XUEGOS DIVERTÍOS

Dau que vos fui poniendo estos díes de p'atrás actividaes pa que trabayarais un pocoñín sobre conteníos yá trabayaos nes nuestres clases de llingua, agora ye un bon momentu pa incluivos una serie de xuegos por si dalguién s'aburre durante estos díes especiales nos que tenemos que tar metíos en casa.

XUEGU DE LA LLAVE
Enantes de ponevos a xugar como llocos, voi esplicar cuál foi l'orixe d'esti xuegu. Esti popular xuegu nació equí, n'Asturies, cuando la llegada del ferrocarril na décaca de 1.850.

El funcionamientu d'esti xuegu de puntería ye senciellu; clávase una llave de fierro ente 47 y 57 centímetros d'altor. Esta llave ta formada por tres aletes de distintu tamañu. L'oxetivu del xuegu ye
da-y a la llave con unes fiches circulares de fierro que pesen mediu quilu. Pa ello'l xugador colócase a una distancia de 14 metros.
En cada partida lláncense seis fiches consecutives a la llave.

¿QUERÉIS XUGAR A LA LLAVE DENDE CASA?
Entós pinchái sobre la imaxe, anque debéis saber que nel xuegu pa dirixir la ficha de fierro tendréis qu'usar les tecles de direición del tecláu y pa llanzar la ficha tendréis que pulsar la barra espaciadora.

EL XUEGU DE LES PAREYES
El xuegu trata d'alcontrar les pareyes nel menor númberu posible d'intentos.

¿CONOCÉIS AL PERSONAXE MITOLÓXICU QUE SAL EN DELLES CARTES DEL XUEGU?

EL XUEGU DE LES MAZANES
Esti ye un xuegu de reflexos. Tenéis una montonera de mazanes de color verde y dalgunes d'eses mazanes cambien de color durante un segundu y ponense coloraes. Lo que debéis facer ye pinchar sobre les mazanes xustu nel momentu que cambien de color.
Nun ye fácil, deberéis ser perveloces.
                              ¡A POR ELLES!

A LA GUETA LA PALLABRA
Contáis con siete intentos p'aldovinar la pallabra. En casu de que nun la acertéis, el protagonista del xuegu moyaráse enteru.

¡MUNCHA SUERTE!

XUEGU DE COLOREAR
Puen pintase dellos dibuxos: barcos, animales (perros, gatos, tortugues, pexes...), pirates, tartes de cumpleaños, etc.
Cada cual que garré un dibuxu y que-y dea color

PER y POR

N'asturianu hai dos preposiciones que signifiquen lo mesmo: PER y POR.

En dellos casos emplegamos la preposición per y n'otros por. La entruga ta clara ¿Cuándo usamos ún y cuando l'otru?

Si nun vos acordáis de cuando usar per y cuando por, pinchái sobre la tabla col ratón y alcontraréis la solución a les vuestres duldes.

Teniendo claro en que situaciones emplegamos PER y en que casos POR, ye un bon momentu pa poner los vuestros conocimientos en práutica. Pa ello debéis pinchar na pallabra XERA

L'ABECEDARIU ASTURIANU

Vaya memoria la mía, nun consigo alcordame de que lletres del abecedariu nun esisten n'asturianu. Creo que yeren tres, pero ¿CUÁLES?

Menos mal qu'atopé esti xuegu nel que tenéis qu'ordenar les lletres del abecedariu, pero cuidáu coles tres lletres que falten.

PINCHÁI SOBRE LA IMAXE












¿YÁ ADIVINASTEIS LES TRES LLETRES QUE FALTEN? CONTARÉISMELO A LA VUELTA CLAS.

LLECTURA DEL CUENTU "EL CUÉLEBRE DE LA VIESCA"

Vamos entamar el blog faciendo una llectura d'ún de los personaxes fundamentales de la mitoloxía asturiana: EL CUÉLEBRE. Pero pa descubrir quién ye esti personaxe, qué carauterístiques tien y lo que-y va soceder, vais tener que pinchar na silueta del cuélebre.

Una vez lleíu'l cuentu tócanos responder a una serie de preguntes persencielles. Pincha equí debaxo onde pon ENTRUGUES.

PRESENTACIÓN DEL BLOG

Bonos díes escolinos y escolines, y tamién a les families. Bienveníos al blog de cuartu de Llingua Asturiana.

El blog, que dirá creciendo a lo llargo de les selmanes, compondráse d'una serie de xuegos, videos y actividaes na nuestra querida llingua, pa que vayáis repasando y pasándolo xenial.

Les actividaes que tán colgaes nel blog tendréis que descargales nel vuestru ordenador. Pongo un exemplu na imaxe.

Más adelantre, cuando tengáis feches les actividaes, les podréis mandar al mio corréu electrónicu, que ye'l siguiente:

                                             Javiermgar@educastur.org


Dicho esto y enantes d'acabar cola presentación del blog, prestaríame resaltar la importancia de la familia nes nuestres vides. Nestos díes, que nun podemos salir de casa, ye un bon momentu pa falar con ellos, rellacionanos lo máximo posible y escuchar les histories y esperiencies que nos quieran tresmitir, dau que ye otra forma d'aprender y conocer meyor a los que tán al nuestru alredor.

Saludos del vuestru maestru de Llingua Asturiana.